Pambiworo Pembawa Acara Tasyakuran
Pambiworo Pembawa Acara Tasyakuran
Pambiworo Tasyakuran
Nuwun,
Kula nuwun.
Assalammu 'alaikum Wr wb.
Sih tentrem rahayu krana peparing Gusti Ingkang Maha Wilasa, ingkang ambabar
gumelaring kabagas kwarasan saha kawilujengan mugi tansah tumedhak-tumanduk
kajiwa kasarira ing jiwangga panjenengan dalah kula waradina sagung kulawarga.
Katur wonten
ngarsanipun sesepuh, pinisepuh saha aji sepuh ingkang panaring pamawas saha
lebda ing pitutur, ingkang satuhu kinabekten. Para pangemban pangembating praja
manggalaning negari ingkang satuhu sinuyudan. Para alim ulama ingkang rinten
dalu tansah sumandhing kitab suci wahyuning Illahi, pinangka punjering panuntun
kiblating panembah ingkang pantes tinulad saha tinuladha dening para umat. Sagung para rawuh kakung sumawana putri ingkang pantes nampi sagunging pakurmatan.
Tadhah deduka, dene kula sampun kumawantun
jejer wonten ngarsa panjenengan kanthi hanilarning tata krami tuwin suba sita, inggih kadereng
anggen kula nuhoni pamundhutipun Mbak Rina Ismurdiningsih, S.Pd sakulawarga
minangka pambiwara laksitaning pahargyan tasyakuran crimen awit sampun
kalampahanipun ijab qobul Mbak Rina
Ismurdiningsih, S.Pd Putra Putrinipun Almarhum Bapak Sutaryono – Almarhumah Ibu
Mujiastuti, ingkang sampun jinatukrami dening Kangmas ( Nurhadi Sukaca ) ingkang
sampun kalampahan ijab qobul rikolo
dinten Sabtu Pon, suryo 28 Mei 2016 wanci tabuh 12.00 WIB wonten KUA Kec.
Jetis, Kabupaten Sleman, kanthi lancar
rancak nir ing sambikala.
Ananging
sakderengipun, kepareng kula ngaturaken puji syukur sahandhap pepada dalem
Gusti Ingkang Maha Agung, mugi lampahing adicara punika wiwit purwa, madya ngantos wasana tansah
pinarengan widada nir ing sambekala. Ugi
mboten kesupen kula ngaturaken wilujeng rawuh.
Sagung para adi lenggah ingkang satuhu luhuring budi, parandene urut
reroncening adicara ingkang sampun rinantam rinakit dening kadang panitia nun inggih.
Anggka setunggal pambuka.
1. Dene
angka kalih donga pangestu wilujeng konjuk temanten kekalih ingkang badhe
katindaaken dening bapa Dalimin, S.Pd, pinangka tetuwangganing kulowargo SMPN 2
Mojogedang.
2. Minangka
adicara angka tiga atur pambagyaharja ingkang badhe kaaturaken dening bapa
Sunarno, S.Pd sahabatipun Mbak Rina Ismurdiningsih, S.Pd MGMP Bhs Inggris.
3. Paripurnaning
atur pambagyaharja kalajengaken poto pinetha pakurmatan kenang kenangan,
4. Kalajengaken
ramah tamah dhahar kembul bujana sesarengan.
5. Minangka
panutuping adicara peparingipun pudyastawa saking para tamu dhumateng
pinanganten kekalih kanthi ajejawat asta.
Mekaten menggah urut reroncening adicara ingkang
badhe lumados ing ngarsa panjenengan sadaya,
sumangga panjenengan kula dherekaken lelenggahan kanthi
mardu mardikaning penggalih sinambi ngrantu laksitaning adicara, sru panyuwun
kula panjenengan kersa hanjenengi, hangestreni minggahipun paring panjurung
pandongo ngantos pari purnaning pahargyan punika.
Kula pribadi nyuwun tambahing pangestu mugi anggen kula ngayahi jejibahan saged
lumampah kanthi gangsar lancar, mboten wonten pambeng satunggal punapa, sepen ing rubeda. Nuwun.
1. Para tamu
sinedhahan kakung putri ingkang satuhu bagya mulya. Keparenga pambiwara
hanglajengaken adicara angka sepisan, nun inggih pambuka. Hambok bilih samudayanipun sampun satata ing gati, sumangga kulo dhereaken tasyakuran Ijab Qobul Mbak Rina
Ismurdiningsih, S.Pd – Kangmas Nurhadi Sukaca kita awiti sesarengan kanthi maos
Basmalah.
2.
Para tamu sinedhahan kakung putri
ingkang satuhu pantes sinudarsana,
sasampunipun pambuka, sumangga kita lajenganken lumaksitaning adicara angka
kalih nun ninggih donga pangestu pudyastuti dumateng temanten kekalih, ingkang
badhe kasariro kapimpin dening Bapa Dalimin, S.Pd, tetuwangganing Kulowargo
SMPN 2 Mojogedang. Hambok bilih samudayanipun sampun satata ing gati, dhumateng panjenenganipun Bapa Dalimin, S.Pd, sasono
pandoyoworo kasumanggaaken.
3.
Para tamu sinedhahan kakung putri
ingkang sinuba ing pakurmatan. Ing wanci kalenggahan punika, ingkang hamengku
karsa badhe hangaturaken lekas wekasing sedya wigatosing perlu, wonten
ngarsanipun para tamu kakung saha putri.
Karana mongkoging penggalih, inggih awit karawuhan panjenengan
sedaya, pramila hamiji tetuangga ingkang pinilih, tanulyan mboten wonten malih
kajawi panjenenganipun Bapa Sunarno, S.Pd sahabat raket MGMP Bhs Inggris.
Saperlu hangaturaken pambagyaharjo wilujeng.
Hambok bilih samudayanipun sampun
satata ing gati, wekdal sakwetahipun kasumanggakaken dhumateng Bapa Sunarno,
S.Pd. Sumangga nun.
4.
Para tamu sinedhahan kakung putri
ingkang satuhu luhuring budi, gangsar rancak, pambagyaharja kalajengaken
adicara ramah tamah kembul bujana, pramila sumangga panjenengan kula dherekaken
lelenggahan kanthi mardu mardikaning penggalih sinambi midangetaken organ
tunggal Danang Sanmala.
5.
Para tamu sinedhahan kakung putri
ingkang satuhu luhuring budi. Purwa madya ngantos wusana adicara tasyakuran ing wanci
kalenggahan punika sampun ndungkap paripurna. Ingkang punika dhumateng panjenenganipun Mbak Rina Ismurdiningsih, S.Pd – Kangmas
Nurhadi Sukaca keparenga
tumuju wiwaraning pahargyan jinajaran para
kadang, saperlu
tangkep asta ndherekaken kunduripun para tamu. Hambok bilih samudayanipun sampun satata ing gati, wekdal sawetahipun
kasumanggakaken para –
para ingkang piniji. Sumangga nun.
Para tamu sinedhahan kakung putri
ingkang satuhu bagya mulya.
6.
Kula pinangka pambiwara, wiwit purwa
madya ngantos wusana hambok bilih anggen kula mranata basa kirang mranani
dhumateng penggalih panjenengan sedaya, kula nyuwun lumunturing sih samudra
pangaksama ingkang agung. Ing wasana, mangga sesarengan asesanti Jaya -
jaya wijayanti,
rahayu ingkang sarwi pinanggih. Nuwun, matur nuwun.
Kunduripun ndherekaken wilujeng.
Wassalamu 'Alaikum Wr. Wb.
0 Response to "Pambiworo Pembawa Acara Tasyakuran"
Posting Komentar